Samhald viktig: Anne Malerbakken (t.v) og Becky K. Mysen sett stor pris på gatefotballaget. – Det å spele fotball saman med andre engasjerer og gir oss tilhøyring og samhald både på og utanfor banen, seier Anne.
Becky og Anne spring for Frelsesarmeens gatefotballag
Deltakarane på Frelsesarmeens gatefotballag møtes til trening kvar veke. No skal seks av dei springe ASICS Sentrumsløpet siste helga i april. Becky og Anne er to av dei.
Av Marianne Røhme, Kondis
Dei to kvinnene synest ASICS Sentrumsløpet er midt i blinken.
– Samhald er viktig for oss. Det å springe Sentrumsløpet saman med seks andre frå laget, hjelper oss til å halde motivasjonen oppe, seier Anne.
I Frelsesarmeens gatefotballag bruker dei fotball og lagspel som tilnærming i møte med menneske som har utfordringar knytt til rusbruk, psykisk helse, utanforskap eller andre marginaliserande faktorar.
– Gatefotball er for meg ein arena der eg kan kjenne meg trygg, oppleve meistring og vere i relasjon til andre. Det er meir enn berre fotball. Det er på ein måte ein fristad, seier ho.
Gatefotballaget har fått startplassane i ASICS Sentrumsløpet gratis av arrangøren. Det sett Becky og Anne stor pris på.
– Det å få vere med i Sentrumsløpet gir oss ei moglegheit til å utfordre oss sjølve, byggje lagstemning og ha det morosamt saman utanfor ballbingen. Vi set oss stadig nye mål. Når Sentrumsløpet sponsar deltakinga, bidreg dei til treningsglede for oss, seier Becky og legg til at dei etter løpet skal ut å ete og feire seg sjølve.
I august arrangerer Frelsesarmeen Norge VM i gatefotball (Homeless World Cup) på Rådhusplassen. Becky og Anne håper at mange kjem innom og heier på laga.